نئی دہلی،7/اکتوبر(ایس او نیوز/ایجنسی) آلٹ نیوز کے شریک بانی محمد زبیر کےخلاف گزشتہ ہفتے غازی آباد کے دسنا دیوی مندرپر حملے کے بعد ایف آئی آر درج کی گئی ہے۔ الزام عائد کیا گیا ہے کہ ’’محمد زبیر اور دیگر ۲؍ مسلم لیڈران، جن میں ارشد مدنی اوراسدالدین اویسی، نے شہر کے اطراف مسلمانوں کومشتعل کرنے کی کوشش کی اور انہیں ترغیب دی کہ وہ دسنا میں شیوشکتی دھام مندر پر حملہ کرنے کیلئے باہر کے لوگوں کو جمعہ کریں۔‘‘ 

۵؍ اکتوبر کو مسلمانوں کے ایک ہجوم کے ذریعے مندر پر حملہ کرنے کے بعد غازی آباد کے ویب سٹی پولیس اسٹیشن میں ۷؍ اکتوبر کو یہ ایف آئی آر بی جے پی لیڈر ادیتاتیاگی کی شکایت پر درج کی گئی ہے۔ مبینہ طور پر محمد زبیر کے انٹرنیٹ پر شیئر کئے گئے ایک ویڈیو کے وائرل ہونے کے بعد مسلمانوں کے ہجوم نے شیوشکتی دھام کا محاصرہ کرنے کی کوشش کی تھی۔

مس تیاگی نے اپنی شکایت میں الزام عائد کیا ہے کہ ’’۵؍اکتوبر کو مسلمانوں کے ہجوم کا شیوشکتی دھام مندر پر حملہ منصوبہ بند سازش تھی۔‘‘ انہوں نے یہ بھی الزام عائد کیا گیا کہ ’’اویسی، زبیر، مدنی، اور دیگر مسلم لیڈران نے مسلسل عوام کو یہ ترغیب دی تھی کہ وہ یتی نرسنگھانند سرسوتیکا قتل کریں۔‘‘ انہوں نےپولیس سے کہا ہے کہ ’’وہ فرقہ وارانہ تشدد کو ہوا دینے والے افراد کو نشان زد کریں اور ان کے خلاف مناسب کارروائی کریں۔ ‘‘ڈاکٹر تیاگی نے یہ بھی مطالبہ کیا ہے کہ ’’یتی نرسنگھا نند کو رہا کیا جائے اور انہیں سیکوریٹی فراہم کی جائے۔‘‘محمد زبیر کے خلاف بھارتیہ نیائے سنہتا کے سیکشن ۱۹۶، ۲۲۸، ۲۲۹، ۳۵۶(۳)اور ۳۵۱(۲)مقدمہ درج کیا گیا ہے۔

 ایف آئی آر میں لکھا ہوا ہے کہ ’’محمد زبیر کے خلاف ڈاکٹر تیاگی کی شکایت پر مقدمہ درج کیا گیا ہے جنہوں نے کہا ہے کہ ’’محمد زبیر نے اشتعال انگیز ٹویٹس کے ذریعے مسلمانوں کو دسنا دیوی مندر پر حملہ کیلئے اکسایا تھا جہاںبڑی تعدادمیں مسلمانوں کا ہجوم جمع ہوا تھا ۔ انہوں نے دھمکی آمیز نعرے لگائے تھے اورپتھراؤ بھی کیا تھا۔‘‘